Ancje chest an a bocje sute: nuie Europe par l’Udin

L’Udin al à sierât il campionât dai displasês cuntune altre disfate interne no dal dut meretade, un 0-1 cuintri une Juventus ae ricercje dai ponts par lâ in Europe (simpri che la Uefa jal permeti). A son zaromai setemanis, se no mês, che Sottil si cjate cui oms contâts tra infortunis e scualifichis. La disfate finâl no gjave significât a un campionât che al podeve lâ in altre maniere: straordenari al principi, cuasi di scudet, mancul ben dopo la polse pai Mondiâi, cuntun finâl di dismenteâ e almancul 6-7 ponts butâts vie. Ae fin, no je rivade une cualificazion in Europe, e nancje su la ‘bande çampe’ de classifiche, ma dome un decim secont puest. Compagn dal an passât, anzit, cuntun pont in mancul (46 invezit dai 47 di Gotti-Cioffi), cul stes numar di partidis vinçudis, 11, e une disfate in plui (14 cuintri 13), ma ancje tancj goi in mancul segnâts (47 cuintri 61: plui o mancul, i 13 che al veve fat Deulofeu!). Cuissà cemût che e sarès lade cence masse infortunis ai zuiadôrs. (A.I.) – 05.06.2023