Un cine curt dedicât ai scarpets

Joibe ai 5 di Jugn, aes 11 di buinore tal cine “Splendor” di S. Denêl (e domenie ai 8 tal Museu storic etnografic di For Davôtri), Maravee Projects al presente il curtmetraç “Passi lunghi. Storie di Stafèts tra lavoro, guerra e festa”. Il documentari al è nassût di une ricercje storiche, ma ancje di intervistis e ripresis sui lûcs de Vuere grande in Friûl e soredut tai laboratoris e tes aziendis là che ancjemò vuê si fasin lis scarpis tradizionâls che a son part de culture popolâr (ancje se al dì di vuê a son deventadis di mode di cualchi bande), clamadis cun cetancj nons: Stafèts, Scarpèz, Scarpis, Zavàtis… Il progjet ideât e diret di Sabrina Zannier, passât prime par trê videos e cuatri senegjaturis pe radio, al è deventât un ‘curt’ cu lis ripresis di Stefano Marzona e Giulia Pittini e il montaç di Cabiria Lizzi, cuntune vôs che e conte il passât, chê de atore Serena Di Blasio. (A.I.) – 05.06.2025