La dirigjence de societât di bale tal zei UEB- United Eagles Basketball Cividale e je stade ricevude vuê di matine dal president de Regjon Massimiliano Fedriga adun cul vice president cu la deleghe al Sport Mario Anzil inte sale zale dal Consei regjonâl.
L’incuintri fat ae presince dai conseîrs regjonâi Stefano Balloch, Roberto Novelli e Elia Miani e dal president dal Coni regjonâl Andrea Marcon, al à dât la ocasion par palesâ il preseament e la ricognossince de Aministrazion regjonâl bande di une realtât buine di firmâ une imprese cence precedents tal panorame de bale dal zei taliane.
Cun di fat la societât sportive di Cividât e je jentrade te storie dal sport regjonâl dopo ve cjapade la Supercoppa di Serie A2 sedi tal 2025, sedi chest an, simpri a Ravenna. Chest sucès dopleât al à puartât la scuadre furlane al plui alt nivel de bale tal zei taliane. Fondade tal 2020, in dome 6 agns di ativitât la scuadre e à savût brusâ lis tapis, rivant simpri al prin puest in graciis di une rigorose programazion e a fuarts valôrs agonistics. (a.d.g.) – 30.08.2026
