Un citadin dal Est Europe, che al è a vivi inte provincie di Udin, al è stât denunziât dai carabinîrs di Davian par robarie ingriviade e possès di imprescj par sfuarçâ. L’om al è acusât di vê fat une schirie di robariis di alcolics intes buteghis de zone.
Il fat al è sucedût dai dîs passâts, cuant che il proprietari di un supermarcjât si jere inacuart de sparizion di ciertis butiliis di alcolics e al veve viodût un client cun fâ suspiet. L’om, za cognossût aes fuarcis dal ordin, al jere za lât a fâ spese un pâr di voltis inte buteghe tant che al veve puartât vie butiliis par passe 250 euros, platadis intun russac. La ultime volte però il lari si jere inacuart di jessi stât viodût dal proprietari e si jere slontanât a pît lassant sô auto bandonade intun parcament pôc lontan.
I carabinîrs a àn rivât in pôc timp a capî cui che al jere il lari e a cjatâ la auto, che dentri e veve altris butiliis dal valôr di passe 450 euros che si pense a sedin stadis robadis in altris buteghis e che par chês cumò i militârs a cirin i proprietaris. I comerciants che a vessin di ricognossi la robe puartade vie de lôr buteghe a puedin clamâ la stazion dai carabinîrs di Davian al 0434 660157, atîf ducj i dîs des 8.30 di matine ae une dal dopomisdì. (a.d.g.) . 30.09.2026
