Pordenon: al tache “Jazzinsieme”

Al è daûr a tacâ il calendari di “Jazzinsieme”, il festival che dal 2019 al puarte a Pordenon il miôr dal jazz internazionâl, mudant la citât intun grant palc par concierts, Dj, laboratoris e tancj altris events. Il moment centrâl al sarâ dai 29 di Mai fint a domenie al prin di Jugn, cuant che sul palc di plaçute Calderari a laran sù Manou Gallo cun Afro Bass Fusion, Olivia Trummer compagnade di Fabrizio Bosso cun For You, il tercet di Alfredo Rodríguez e il cuartet di Ambrose Akinmusire. Il cjâf lûc e altris comuns dongje si prontin par vivi i prins apontaments dal program metût adun de associazion culturâl Blues In Villa. Si tache vinars ai 16 tal spazi OESSE di palaç Ricchieri cun “Intorno al Jazz”, un spetacul che al messede musiche e peraulis, il jazz di John Coltrane, Paolo Conte, Duke Ellington, Sonny Rollins e altris, sunât di Marco Ballestracci e Massimo Zemolin. Sabide ai 17 si tache il calendari dai Club Live cun “Soul Cookin’” e domenie ai 18 al sune il Bend, Slide & Shift Trio di Rudy Fantin, Roberto Colussi e Simone Gerardo. (A.I.) – 15.05.2025