La stagjon “contemporanie” di Gardiscje

Daspò de scree de stagjon dal “Nuovo Teatro”, il teatri gnûf comunâl di Gardiscje, e tache ancje la rassegne te Sale Bargamas, simpri metude adun di Walter Mramor par ArtistiAssociati e dute dedicade al contemporani. La prime des dîs propuestis di “Innesti”, che si presente tant che stagjon di conessions “che no si puedin proviodi par nuie”, e sarà presentade di miercus ai 4 e fint a vinars ai 6 Novembar: il monolic “La errante” di Laura Marinoni, gjavât fûr di “Madre Courage e i suoi figli” di Bertold Brech. Ai 17 di Novembar, la compagnie di danze Arearea e presente un progjet fat a pueste pe stagjon e po dopo a rivin Alessandro Bandini, Andrea Bosca, Paola Fresa cun “P come Penelope”, Massimo Somaglino e Alessandro Lussiana cuntun titul aromai classic, “Salām/Shalom. Due Padri”, Filippo Capobianco e altris, fint ai 5 di Mai. Ducj i spetacui a saran presentâts in repliche dôs voltis. (A.I.) – 03.11.2026