La edizion plui internazionâl di simpri dal “Pordenone Docs Fest”, la rassegne dal cine “de veretât”, e tache miercus ai 10 li dal Cinemazero, pe prime volte cul patrocini dal Parlament European. I documentaris in anteprime taliane a saran 24, in dut 65 i titui programâts par cjalâ monts lontans e desenis di ospits di ducj i continents, par cinc zornadis penzis di proiezions, incuintris cun regjiscj e protagoniscj dai cines, dôs retrospetivis, cunvignis, laboratoris par grancj e piçui e musiche dal vîf ogni dì, cuntun grant conciert finâl domenie ai 14. La rassegne dedicade al cine documentari in ducj i siei aspiets e darà acet a ospits di dut il mont e la serade di viertidure e varà un messaç fuart cul premi “Il coraggio delle immagini” dât a Mediha, zovine frute de minorance yazida dal nord dal Irak, sorevivude dopo jessi stade puartade vie e vendude tant che sclave di chei dal Isis. (A.I.) – 09.04.2024
A Pordenon la rassegne sul cine “de veretât”
20
