Setante students des scuelis superiôrs a àn jemplât i bancs dal Consei regjonâl intune cun cualchi lôr insegnant. La decime seconde legjislature si è concludude cussì, tra premiazions, fotos e selfie, “e al è un biel segnâl pal futûr, cul auguri che cualchidun di voaltris al puedi partecipâ ai lavôrs di cheste Aule”, al à comentât il president Piero Mauro Zanin, al at finâl dal so mandât.
La ocasion speciâl e jere rapresentade des premiazions dal bant di concors pes scuelis superiôrs inmaneât dal Consei intune cul Aiccre Fvg, sul teme che al è plui cjâr ae associazion dai Comuns e des Regjons de Europe, o sedi il futûr dal nestri continent. I students a jerin clamâts a tratâ “la Europe che o volarès”, cjapant a riferiment in particolâr i temis relatîfs a pâs, libertât, ambient e futûr.
Dîs dai undis istitûts partecipants a àn sielt il prin branc dal concors, che al previodeve la realizazion di progjets specifics, intant che il sôl liceu Percoto di Udin al à sielzût par un percors di formazion, sui temis dal cambiament climatic. Tant positîfs i judizis de comission valutadore, tant che si è decidût di premiâ dutis lis scuelis, adotant il criteri di 4 ex-aequo al setim puest, pûr cence rinunziâ a esprimi une graduatorie che ae fin e à assegnât il prin puest al liceu sientific Oberdan di Triest. Al secont puest un altri liceu sientific, il Marinelli di Udin, al tierç l’Isis Deganutti, che al à sede simpri inte capitâl furlane, al cuart il liceu Stellini di Udin, al cuint l’Isis di Sacîl e Brugnere, in provincie di Pordenon, al sest il sientific Copernico di Udin. Setims a pari merit l’Isis Torricelli di Pordenon, l’Isis Mattei di Tisane (Udin), l’Isis Brignoli-Einaudi-Marconi di Gardiscje (Gurize) e l’Isis Flora di Pordenon. (A.D.G.) – 13.04.2023
