A calin i ocupâts intal Friûl-Vignesie Julie, ancje se la domande di lavôr e reste alte. Compliç un ralentament gjenerâl de economie de regjon, e je calade in maniere lizere la ocupazion intal prin semestri dal an: -1,4% a pet de prime part dal 2022. Si segnalin ancje une riduzion dai disocupâts (-10.2%) e un aument contemporani dai inatîfs in etât di lavôr (+2.1%). I dâts a rivin de analisi dal Osservatori regjonâl dal marcjât dal Lavôr su dâts Istat
Chestis tindincis a son leadis soredut al ralentament de ocupazion inte industrie (-7.6% intai sîs mês), ma si ridûs in maniere sensibile ancje la ocupazion intal setôr cumierç, albiercs e ristorants (-6.7). In cressite la ocupazion intes costruzions (+4.1%) e intai servizis (+2.6%) e inte agriculture, in cressite di cuasi 2.000 unitâts (+10.7%). E cale la ocupazion dipendente globâl (-2.3%), ancje se lis assunzions par chest profîl intai prins siet mês di chest an a son cuasi 161 mil cuntune cressite dal 2% a pet dal stes periodi dal an passât e plui 15% a pet dal periodi prime de pandemie. Si osserve, dut câs, un ralentament des assunzions a timp indeterminât.
“Al da pinsîr il sbassament inte industrie, un setôr tant impuartant là che a son cjapâts plui o mancul il 25% dal totâl – al comente Carlo Corvino, Responsabil dal Osservatori Marcjât dal lavôr F-Vj -. Dôs lis ipotesis: la prime e je che il setôr al è in calâ par efiet di un aument sensibil de ocupazion intai periodis precedents, une sorte di saturazion; chê altre e je di nature economiche calcolant la riduzion dal trafic des esportazions (-9.7%) e il ralentament de produzion industriâl”.
Intal complès la situazion in F-Vj e reste plui che positive: il tas di ocupazion intal II trimestri 2023 al è di 68.9%, fra chei plui alts in Italie, 75.7%, masculin in cressite e 62% feminin, in calâ. Di cuintri il tas di disocupazion al è al 4.5% (oms al 3.2%, feminis al 6.1%), fra chei plui bas in Italie. (a.d.g.) – 19.09.23
