La Zonte regjonâl, daûr de propueste dal assessôr regjonâl ae Difese dal ambient Fabio Scoccimarro e di conciert cui assessôrs aes Risorsis agroalimentârs Stefano Zannier e aes Ativitâts produtivis Sergio Emidio Bini, e à autorizât la presentazion di istancis di finanziament suntun bant publicât dal Ministeri des Infrastruturis pe realizazion di infrastruturis idrichis in diviers teritoris dal Friûl-Vignesie Julie.
Il finanziament domandât al rive a plui o mancul 400 milions di euros e i progjets a rivuardin in particolâr il sglereament dal lât di Barcis e inte stesse suaze di chel di Ravedis; la realizazion di une condote di colegament tra il canâl Sade e il sisteme Ledre-Tiliment pal recupar parziâl de puartade dal scjari de centrâl di Somplât, propueste che e à cuintri la mobilitazion dai Comitâts che a domandin invezit di fâ une condote che e gjavi in maniere direte lis aghis di scjari de centrâl par evitâ cussì l’imbuniment dal lât. Il finanziament al varès di paiâ ancje la realizazion di oparis in zone Ciline Nord, cun gnovis condotis di aduzion; la realizazion dal acuedot pe distribuzion de aghe potabile al servizi de zone dal Consorzi industriâl Puint Ros, la realizazion de galarie tra i lâts di Ca Bosc e Ca Zul in val Tramontine. (a.d.g.) – 23.10.23
