Setemane de culture furlane cun dusinte events

La “Setemane de culture furlane” inmaneade de Societât Filologjiche Furlane e torne ancje chest an par presentâ ativitâts e iniziativis par cognossi miôr e valorizâ aspiets e protagoniscj de nestre storie, de nestre tradizion e de nestre identitât. Cun passe 200 events in program dai 8 ai 18 di Mai, la rassegne e conferme numars di adesions e di partecipazion une vore impuartants. Ancje chest an no mancjaran ocasions par valorizâ il nestri patrimoni artistic e culturâl, musicâl, teatrâl, ambientâl e storic cun incuintris e conferencis, presentazion di libris, ativitâts pai fruts, escursions, spetacui teatrâi e musicâi, la riflession su la lenghe furlane e chês altris lenghis dal teritori e la tradizionâl “Fraie de Vierte” a sierâ lis manifestazions: chest an pe prime volte a Torean, domenie ai 18 di Mai. Une buine part dai events a son in presince, parcè che la partecipazion e reste un element fondamentâl, ma une part e je su la plateforme www.setemane.it, par rivâ ancje ai furlans che a son sparniçâts in Italie e tal mont. Tra chescj, i filmâts che a fevelin des ultimis “rivistis furlanis” cjamadis tal portâl www.rivistefriulane.it e, tal an di Gurize/Gnove Gurize capitâl europeane de culture, chei cu lis ricetis di “gustâ gurizan”. No mancje la riflession su lis personalitâts dal passât e il lôr contribût par fâ cressi la nestre comunitât furlane: chest an a saran memoreâts in particolâr i leterâts Celso Macor tal Gurizan, Angelo Pittana (Agnul di Spere) a Codroip e Dino Virgili a Martignà, lis studiosis di etnografie Andreina Nicoloso Ciceri e Renata Steccati, i pitôrs Giuseppe Furnio in Cjargne e Umberto Martina tal Friûl ocidentâl, ma ancje altris benemerits di ogni timp. (A.I.) – 07.05.2025