Il viaç di Ungaretti si ferme a For Davôtri

Si siere sabide ai 19 tal Cine Teatri di For Davôtri il progjet “Ungaretti in prime linie. De peraule sclete ae maravee de imensitât”, cul spetacul teatrâl “Ungaretti e lo scarpone della pace” (Ungaretti e il scarpon de pâs). Il progjet – ideât e diret di Sabrina Zannier, prodot di Maravee Projects – al à puartât il public sui trois che a son stâts de vuere, par rigjenerâ la memorie traviers il sium di une pâs pussibile. In graciis dal spetacul de poliedriche autore e atore Claudia Contin Arlechin ai tescj e la vôs poetiche dal storic Angelo Floramo, al ven proponût un “cjamin esperienziâl” dedicât ae memorie e ae opare di Giuseppe Ungaretti. Incentrât sul leam profont fra il grant poete, pionîr dal ermetisim talian, e i teritoris dal Friûl-Vignesie Julie, il cjamin al à passât dute la regjon, contant in sene il dialic jenfri il poete e un altri artist soldât, l’austriac Egon Schiele, che su chel altri front de trincee al combateve e al piturave la umanitât. (A.I.) – 18.04.2025