Dôs struturis adun intal non di Pasolini

Il PAFF! International Museum of Comic Art di Pordenon e il Centri Studi Pasolini di Cjasarse a àn firmât une convenzion par “fâ sisteme” tra lis istituzions intune opare di contaminazion che e viôt intun il fumet, il cine e la leterature, cressint cussì la ufierte culturâl, artistiche e di promozion turistiche traviers un lavôr zontât, che al tacarà chest an. La convenzion si concretizarà inte organizazion sinergjiche di mostris, incuintris e scambis culturâi: ducj contignûts di grant valôr, di presentâ in alternative intes dôs sedis. Ven a stâi: il contignidôr culturâl inovatîf nassût intal 2018, che al dopre il strument divulgatîf dal fumet e il centri impegnât in diviersis ativitâts che a àn tant che obietîf primari il studi, la divulgazion e la valorizazion de figure e de opare di Pasolini, cuntun riferiment particolâr ai siei agns furlans. (A.I.) – 08.01.2024