Incident mortâl, tal dopomisdì di vuê, a Rude. In vie Europa Unita, dilunc de strade regjonâl 351 – sul fat a indaghin i carabinîrs di Palme – a pierdi la vite al è stât un motociclist di 20 agns resident a Rivignan Teôr.
Al pâr che il zovin, dopo vê pierdût il control de sô moto, al sedi sbrissât sul asfalt e dopo al sedi stât cjapât sot di un mieç che al rivave di chê altre bande.
Dibant lis provis di rianimâlu de bande dal personâl sanitari rivât sul puest cun elisocors e ambulance. Alarmadis ancje lis Vuardiis dal fûc. (A.D.G.) – 27.06.2023