Metude sot secuestri a Udin la palacine dulà che ai 25 di Mai la Polizie e veve fat 15 percuisizions ae fin di une articolade investigazion, che e veve metût in lûs une ativitât floride di spaç di droghe di bande di un grup di afgans e pakistans.
Il fabricât al jere deventât pardabon un marcjât dal spaç di cocaine e hashish. Il riferiment principâl par chei che, a Udin e intes zonis dongje, a volevin cuistâ stupefacents.
I trafics a jerin gjestîts soredut di int di origjin mediorientâl, che e veve cjatât ripâr inte palacine di viâl Vignesie che e je stade secuestrade su disposizion de autoritât judiziarie.
Tant numerôs i episodis di spaç documentâts, sucedûts sedi dentri, sedi al esterni de palacine. La cjase su doi plans e je di proprietât di un forest, che nol risulte indagât.
Nancje la esecuzion des misuris cautelârs fatis dal Gip dal Tribunâl di Udin e lis percuisizions sucessivis a vevin metût fin ae ativitât di spaç intal stabil, tant che diviers citadins a son lâts indevant a segnalâ il spaç.
Par chest, la Scuadre mobile e à domandât e otignût de autoritât judiziarie il proviodiment di secuestri preventîf dal imobil. (A.D.G.) – 21.06.2023
