Scuintri tra dôs veturis cheste matine tor lis 9.30 a Pordenon in vie Malignani. A son intervignudis lis Vuardiis dal Fûc di Pordenon par diliberâ une persone, restade blocade dentri dal so auto.
Lis Vuardiis a àn metût in sigurece la aree e cul ûs di pinzis e fuarpiis idraulichis a àn viert un varc inte autoveture danezade, permetint cussì l’intervent dai sanitaris rivâts sul puest cuntune ambulance di Pordenon e l’elisocors mandât de Sores.
Dôs lis personis restadis feridis: une, in codiç zâl, e je stade puartade intal ospedâl di Pordenon in ambulance intant che chê altre, ancje se in codiç zâl, e je stade puartade in elicotar a Udin. Sul puest ancje Polizie Stradâl e Locâl.
Un secont incident stradâl si è verificât a Davian in vie Piave: ancje in chest câs si son dadis cuintri dôs veturis; trê lis personis restadis feridis. Sul puest, i infermîrs de Sores a àn inviât daurman dôs ambulancis. Une femine e je stade traspuartade in codiç zâl intal ospedâl di Pordenon, dulà che a son rivadis ancje chês altris dôs, ma in codiç vert. (A.D.G.) – 02.03.2023
