Al jere stât arestât trê agns indaûr par une inchieste su apalts pilotâts a Premariâs. Vuê l’ex sindic Roberto Trentin al à patizât un an e 9 mês di reclusion, pene sospindude.
Si è concludude cussì, devant dal Gup di Udin Matteo Carlisi, la vicende judiziarie dal ex sindic di Premariâs, cjapât dentri intal 2020 intune inchieste su cualchi apalt pilotât intal Comun. Al jere acusât di turbative di aste, conturbade libertât di sielte dal contraent, fals in at public e imbroi, intal periodi tra il 2017 e il 2020. Intal Lui di trê agns indaûr, Trentin al jere stât arestât e mitût ai arescj domiciliârs. Si jere dimetût pôcs dîs dopo.
Al è un patizament che, dut câs, no je une amission di colpe, cemût che al à dit Trentin.
I difensôrs, i avocats Guglielmo Pelizzo e Stefano Buonocore, a sotlinein che, se erôrs a son stâts, Trentin ju à fats intal interès de comunitât cul obietîf di otimizâ timps e risorsis. (A.D.G.) – 29.03.2023