La Vuardie di Finance dal Comant Provinciâl di Pordenon intal cors di ativitâts di control sabide ai 30 di Setembar a àn scuviert 9 lavoradôrs in neri: 7 citadins indians, tra chescj un che al à domandât asîl, impleâts intun apieçament agricul e 2 talians intun locâl public. Sanzionâts i doi datôrs di lavôr e proponude par ducj i doi la sospension de ativitât. Il prin intervent, risultât de segnalazion di un Financîr libar dal servizi, al è stât fat de patulie de Tignince di Spilimberc in servizi “117” e di doi militârs di Pordenon, intun teren di Siest, dulà che, tra i 11 bracents presints, a son stâts individuâts 7 citadins indians cence contrat, tra chescj un che al à domandât asîl. Il secont servizi, inte serade di sabide, al è nassût invezit dal control fat de patulie dal Grup Pordenon in servizi “117”, che, intun locâl di Davian, al à cjatât 2 confasûts ae ristorazion “in neri”. Ai doi datôrs di lavôr e je stade aplicade, par ognidun dai assegnâts, la sanzion di 1.800 a 10.800 euros, cressude, par chel che al à domandât asîl di no podê impleâlu, di un minim di 2.160 euros a 12.960 euros. Par ducj i doi e je stade proponude, dal Ispetorât teritoriâl dal Lavôr competent, la sospension de ativitât, vint impleât personâl in neri in misure superiôr dal 10% dai assegnâts regolârs. L’imprenditôr che al veve impleât il citadin indian che al à domandât asîl al è stât denunziât ae autoritât judiziarie di Pordenon par violazion dal articul 22, come 12, dal Test Unic su la imigrazion.
Dal principi dal an a son 159 i lavoradôrs scuvierts des Flamis Zalis dal Friûl ocidentâl: 146 in neri e 13 iregolârs; 91 i datôrs di lavôr sanzionâts e 35 lis ativitâts sospindudis, a conferme dal impegn intal monitorament economic-finanziari dal teritori a difese des realtâts imprenditoriâls locâls che a crodin e a operin intune economie “sane” e siore. (a.d.g.) – 03.10.23
