Udin capitâl dal cine orientâl

Dal 1999, Udin e je la capitâl europeane dal cine orientâl, anzit, dal Orient lontan: tiere di gradis produzions e ancjetancj grancj publics, di prodots comerciâi che dispès a san contâ la societât miôr di ducj chei altris, ma no dome. La vincjesime setime edizion dal Far East Film Festival ideât e inmaneât dal CEC di Udin al è un viaç intun Mont ‘altri’ che al è daûr a cambiâ, compagn dal nestri, ancje se intune altre maniere. Ma soredut al è e al vûl jessi une voglade atente e inamorade su la produzion di un continent grandonon. A Udin a son 75 i cines (48 in concors) che a vegnin di undis Paîs diferents, cun siet ‘primis’ mondiâls, 20 in Europe e 19 in Italie. Nûf dîs dentri dal Orient contemporani, tal teatri gnûf “Giovanni da Udine” a tal “Visionario”, cuntun public che al rive ancje di lontan e desenis di ospits. Fra chei, la stele Sylvia Chang, che e cjaparà il premi ae cariere “Gelso d’oro” (Morâr di aur). Par vierzi lis proiezions, ai 24 di Avrîl, la comedie cinese “Green Wave”, une storie di sperancis e erôrs. Po dopo, ducj i cines che tai ultins mês a àn fat il plen tes salis de Cine, de Coree, dal Gjapon, di Taiwan e vie indevant fint ai 2 di Mai. Dut câs il festival no si ferme achì. Un centenâr di events, no dome in citât ma ancje ator pal teritori, a son za tacâts e po dopo a son ancje i apontaments speciâi: lis retrospetivis, la cusine, lis fiestis, i concierts, la gare pai ‘cosplayer’. Dai 26 di Avrîl te Cjase Cavazzini a saran in esposizion cent oparis origjinâls, tantis di chês esponudis fûr dal Gjapon pe prime volte, par contâ l’univiers di Shigeru Mizuki, un dai plui grancj mestris gjaponês di manga e esperts di storiis di “yokai” – lis aparizions mostruosis de mitologjie gjaponese – cu la mostre “Mondo Mizuki, Mondo Yokai”, la prime in Italie, vierte fint ai 30 di Avost. (A.I.) – 24.04.2025