In Filologjiche al è ancjemò Nadâl

Lis lûs dal arbul a son za tornadis te scjate e biel planc dut al è daûr a tornâ al so drandran di ducj i dîs. In Palaç Mantica, però, fin a domenie si podarà ancjemò vivi il spirt des fiestis, in graciis dai ultins events te suaze de rassegne ‘Nadâl in Filologjiche’, inmaneade de Societât Filologjiche Furlane cu la poie dal Comun di Udin. In chescj dîs a son daûr a sierâsi i ultins incuintris cu lis scuelis, ae scuvierte de sede di Udin e des tradizions e dai personaçs de culture furlane. Vinars ai 12 di Zenâr, aes 8 e mieze sore sere, al è in program il recupar dal conciert “Viaç inte poesie dal Nûfcent”, di e cun Lino Straulino, Agnese Fabbro e Anastasia Fabbro, in ricuart di Giovanni Battista Marzuttini, musicist, pitôr, poete, fotograf e inzegnîr, che tal 2023 a colavin i 160 agns de nassite. Vie pe serade a vignaran presentadis sedi cjançons scritis di “Tite Grison”, sedi rangjaments componûts su lis peraulis dai plui innomenâts autôrs de leterature furlane dal secul stât. (A.I.) – 10.01.2024