I Sick Tamburo tai club di dute Italie

Vie pal an i Sick Tamburo a son stâts protagoniscj di un percors dal vîf une vore penç, tacât cuntun un tour ator pai club par promovi il lôr gnûf album “Dementia” – jessût tal mês di Zenâr, cuntune cuviertute dissegnade di Davide Toffolo – e lât indevant par dut l’Istât sui palcs di sene dai festival plui impuartants de Italie. Il grup pordenonês di Gian Maria Accusani al è pront a tornâ a sunâ intai club di dut il paîs cul lôr “Winter Tour”, il Tour dal Invier, une gnove schirie di concierts che a cjapin dentri cuasi dutis lis regjons talianis fint a Novembar, puartant une dimension plui intime e fuarte e un program gnûf che al cjape dentri dute la lôr storie musicâl. Il tour al scomence joibe ai 8 a Turin, li dal “Notorius”, e sabide ai 10 e sarà la lôr uniche tape regjonâl – par cumò – tal teatri”Miela” di Triest. (A.I.) – 07.10.2026