La Vuardie di finance di Udin e à scuvierte une evasion grande a San Zorç di Noiâr, fate di dôs aziendis forestis che tal comun de basse a vevin un ufici di rapresentance che, te realtât al vendeve cjarte decorative sul marcjât talian cence denunziâ nancje un euro. A son passe 2,5 i milions di euros platâts ae tassazion cjatâts dai financîrs. Tra impuestis e multis la cifre finâl e sarà plui alte di 800 mil euros.
I aciertaments fats dai agjents de Compagnie di Cividât, a son tacâts controlant i scambis tra lis aziendis de provincie e il forest, incrosant lis informazions tignudis dentri des bancjis dâts. I financîrs a son cussì rivâts a un ufici leât a dôs aziendis forestis, une spagnole e une austriache, che a jerin di proprietât però de stesse multinazionâl.
Dentri dal ufici a lavoravin doi diretôrs comerciâi: cheste ativitât, pai financîrs, e jere leade a dôs organizazions stabilis che a varessin vût di declarâ i redits prodots in Italie.
Daspò dal confront fat cu la Vuardie di finance e la Agjenzie des Jentradis, lis impresis a àn paiât daurman passe 700 mil euros e si son ancje impegnadis a paiâ altris 120 mil euros ae scjadince dai tiermins pe declarazion fiscâl sui redits dal 2025. (a.d.g.) – 02.10.2026
