Oms dal Consorzi agrari sot investigazion par fraude ae Ue

da Alessandro Di Giusto

Agriculture furlane cence peraulis daspò che la Procure de republiche di Udin e à viert un fassicul pe ipotesi di concors in fraude par cjapâ bêçs publics, tal particolâr contribûts de Union europeane. Pal moment – al scrîf il gjornalist di Telefriuli Hubert Londero – a son 10 lis personis indagadis, dutis leadis al Consorzi agrari dal Friûl-Vignesie Julie, ma il numar al podarès lâ su. Lis indagjins a son coordenadis dal Pm Andrea Del Missier.

La ipotesi de acuse e je che dut al sedi leât ai bêçs dâts de Europe midiant dal Font european agricul di garanzie e dal Font european agricul pal disvilup rurâl che a son leâts aes limitazions dal doprâ fertilizants azotâts. Pe acuse, prime dal 2026 i dipendents dal Consorzi, adun cun altri sogjets a vevin fat scrivi tai documents che a vignivin vendûts fertilizants cence azot ai agricultôrs che a compravin tal Consorzi. Te realtât si tratave di uree agricule, l’acolt azotât plui concentrât e doprât in agriculture.

Tor de metât dal mês passât i carabinîrs, su mandât de Procure, e vevin percuisît i uficis dal Consorzi.

Nissun coment su la cuistion de bande di Matteo Zolin, diretôr dal Consorzi. (a.d.g.) – 21.11.2026

Lasse un coment

Redazion

logo

Editoriale Il Friuli Srl
P.IVA 01907840308

Regjistrazion al Tribunâl di Udin n. 9

dai 6 di Lui dal 2022

PRIN PLAN

Progjet finanziât de ARLeF
Agjenzie Regjonâl pe Lenghe Furlane

Chest sît al dopre i cookies par miorâ la tô esperience di navigazion. Lant indevant tu acetis la nestre informative su la privacy. Acetâ Lei di plui