Un re che forsit nol è un re, un atôr blocât intal so personaç e une veretât che si sconfont cu la matetât. In struc: ce sucedial cuant che la linie jenfri realtât e finzion si disfe, rindint impussibil distingui ce che o sin di ce che o crodìn di jessi? Cheste domande e je di ispirazion par “Re Liar – L’uomo con la corona”, L’om cu la corone, un dai spetacui plui pençs e popolârs dal repertori di Anà-Thema Teatro, che al torne sul palc di sene sabide ai 21 tal Teatri della Corte di Osôf. Il spetacul, diret di Luca Ferri, al fâs part de stagjon che e celebre il vincjesim aniversari de compagnie, tornant a puartâ sul palc cualchi produzion che e à segnât il so viaç artistic. Anà-Thema si confronte cuntun altri grant protagonist dal univiers di Shakespeare, mudant l’innomenât re Lear intun re Liar, ven a stâi bausâr, che nol è intun cjistiel, ma dentri di un ospedâl psichiatric! (A.I.) – 19.11.2026
Il re bausâr di Anà-Tema
19