Musiche furlane te “Cavallerizza”

da Andrea Ioime

La “Cavallerizza” e ospite une zornade interie par presentâ la etichete furlane “manledrose” . Il gnûf spazi culturâl de citat di Udin, screât te Vierte passade e rivât ae prime stagjon uficiâl, al va indevant cul so program tai ambients ricualificâts de ex caserme “Osoppo”, che al è promovût no dome de orchestre Filarmonici Friulani, di SimulArte e de Coral dal F-Vj, ma ancje di altris ents, di chenti e dal forest. Domenie ai 22 di Novembar, des 5 e mieze di dopomisdì, e sarà presentade la produzion musicâl une vore ferbinte metude adun tal ultin an e mieç de associazion culturâl Inniò pal progjet discografic Manledrôs – realizât cu la storiche etichete Nota Records di Valter Colle, cul jutori de ARLeF – Agjenzie regjonâl pe lenghe furlane e de Regjon F-Vj. La zornade e previôt siet concierts curts e di grande fuarce sonore e visive su doi palcs, cuntun flus cence polse di musiche dal vîf par dimostrâ cemût che la marilenghe e pues jessi un teren di sperimentazion, crevadure e inovazion. A presentâsi,i artiscj e i grups dal progjet: dal tango acustic dai Cûr di veri al grunge emotîf dai Pestefun, la serade e metarà in lûs lengaçs musicâi une vore diferents, ma che a condividin la volontât di esplorâ gnovis pussibilitâts espressivis. Spazi ancje aes atmosferis folk, blues e psichedelichis di Devid Strussiat, a Andrea Bitai, protagoniste di un origjinâl progjet par percussions e violoncel. No mancjaran la energjie iriverent dai Arbe Garbe, lis “vilotis punk” dai Mercatovecchio che e messedin critiche sociâl e ironie tai classics cjants di ostarie e Massimo Silverio, une des vôs plui rapresentativis de sene alternative furlane di vuê. (A.I.) – 21.11.2026

Lasse un coment

Redazion

logo

Editoriale Il Friuli Srl
P.IVA 01907840308

Regjistrazion al Tribunâl di Udin n. 9

dai 6 di Lui dal 2022

PRIN PLAN

Progjet finanziât de ARLeF
Agjenzie Regjonâl pe Lenghe Furlane

Chest sît al dopre i cookies par miorâ la tô esperience di navigazion. Lant indevant tu acetis la nestre informative su la privacy. Acetâ Lei di plui