Cualchi zornade indaûr, e je stade sfantade une fraude cuintri di un vieli di 79 agns che al è a stâ te provincie di Udin. L’om al jere stât contatat suntune chat di une femine che si jere presentade tant che intermediarie di une societât di invistiment.
Dilunc de conversazion la femine e je stade une vore brave tal otignî la fiducie dal om daspò che i veve prometût di fâ vuadagns une vore alts invistint dai bitcoin piçulis sumis di euros in contants.
Tal dopomisdì dai 1 di Otubar però la femine dal om si jere inacuarte che al jere jessût e che par strade al stave fevelant cuntun no cognossût. Simpri tal dopomisdì la femine e veve scoltât l’om che al fevelave al telefon di bitcoin e dal fat che al varès mandâ bêçs tai Stâts Unîts, ma chel che al jere di che altre bande al veve dit che al sarès passât lui a cjoli i euros. Par di plui, simpri la siore si jere inacuart che tai dîs prime l’om al veve tirât fûr bêçs dal cont in bancje; par chest metude in suspiet e à clamât i carabinîrs dant ancje il numar de targhe de moto doprade dal om che al jere rivât par cjapâ i bêçs.
Une patulie de stazion locâl in pôc timp e à intercetât e blocât il fraudadôr, un om di 50 agns che al vîf in provincie di Udin, che intor al veve i 1.150 euros dâts dal vieli. Il fraudadôr al è stât denunziât pal reât di fraude.
I carabinîrs a consein di no fidâsi di chei che a prometin vuadagns garantîts e facii, di controlâ se cui che al fâs la propueste al sedi iscrit ai elencs de Consob, de Bancje di Italie o de Esma e di no dâ mai a int no cognossude i dâts bancjariis, dai documents di identitât o des peraulis di ordin. (a.d.g.) – 06.10.2026
