Lis Conseiris regjonâls Simona Liguori (Patto per l’Autonomia-Civica Fvg) e Rosaria Capozzi (M5s) a àn presentât un emendament al dissen di leç 95, Asstestamento bis, che al previôt di meti su un studi di fatibilitât par inviâ un servizi regjonâl di Pront socors veterinari.
“O vin dipuesitat sîs mês indaûr la nestre propueste di leç pe istituzion dal Servizi sanitari regjonâl veterinari di base pe cure dai nemâi di compagnie – a visin lis dôs conseiris – e o din acet cun favôr al apel dal president dal Ordin dai miedis veterinaris de provincie di Udin, Michele Plozzer, che al poie la nestre domande di istituî un servizi di Pront socors veterinari. Par chest o vin puartat ae atenzion de tierce comission consiliâr di vuê chest argoment, proponint al assessôr ae Salût Riccardo Riccardi, di inviâ un studi di fatibilitât par capî cualis risorsis e trop personâl al coventaran par disvilupâ chest servizi”. (a.d.g.) – 07.10.2026
