I “curts” a contin il dì di vuê a Gurize

Cemût puedial il cine regjistrâ un mont che al sparìs? E cemût rivial a tornâ metilu dongje midiant dal voli, il montaç, la memorie o la imagjinazion? Cheste e je dome une des domandis che a traviersin chest an la rassegne “Omaggio a una visione”, Omaç a une vision”, che si davuelç a Gurize e Gnove Gurize di martars ai 29 fint ai 4 di Otubar. Tacant des imagjins di archivi par rivâ al cine contemporani, dai autôrs plui zovins aes visions di autôr, il festival al torne a esplorâ lis cuistions fondamentâls de imagjin cinematografiche, cuntun program che al cjape dentri 15 luncmetraçs e uns 70 curtmetraçs. Il festival si vierzarà cul documentari “La valle del mio respiro”, La valade dal me fiât, de regjiste slovene Manca Juvan, che e sarà presinte ae prime vision. La edizion di chest an no cîr di dâ une imagjin ugnule de Europe, ma e je interessade in mût principâl ai mûts di cjalâle, di ricuardâle e di rivâ a metile adun in cetantis manieris diferentis midiant dal cine. Par cheste reson, il program no si siere cu lis proiezions, ma si vierç a lezions, incuintris e laboratoris creatîfs, cjapant dentri une cjaminade cinematografiche e un laboratori dedicât ai manifescj dal cine. (A.I.) – 28.09.2026