Al somee di fevelâ di robis di altris timps e invezit chel di robâ energjie eletriche al somee jessi un compuartament tornât di mode ancje in Friûl. Daspò dal câs di un paîs dongje Glemone, indulà che un om al è stât denunziât dai carabinîrs par vê supât par trê agns passe 11 mil kWh, e je la volte di Vinûf di Fontanefrede, indulà che al è stât cjatât fintremai un alaçament abusîf diret ae linie eletriche cence nancje doprâ il contadôr, come tal câs che o vin za dit.
I agjents de Polizie locâl e i carabinîrs a àn cjatât un cabli che al jentrave sot dal cuviert di une cjase puartant energjie eletriche ai eletrodomestics. La robe e lave indenant di almancul un an. Trê personis, dutis sui 40 agns, a son stadis denunziadis a pît libar par concors in robarie ingriviade.
L’implant al è stât metût sot secuestri e cumò i tecnics di E-Distribuzione a stan cirint di calcolâ trope corint che e je stade doprade cence paiâ. (a.d.g.) – 29.09.2026
