Al Cjistiel di Udin il spetacul de icone Drusilla Foer

Dopo il conciert dai Boomdabash pe “Gnot Blancje” di Udin, un gnûf apontament impuartant al è in program joibe ai 6 sul cuel dal Cjistiel. A lâ sù sul palc e sarà la cjantante, atore, autore e artiste Drusilla Foer, calcolade une vere icone di stîl, che e puartarà in sene – in version inzornade e estive – il so recital “Eleganzissima”, un spetacul di cult in continue trasformazion. La date udinese dal “Summer Tour” di Drusilla Foer, in esclusive regjonâl, e je organizade di Zenit dentri tal calendari di “UdinEstate”. Un sucès consolidât za di cualchi stagjon, ma mai compagn di se stes, “Eleganzissima” al è un viaç fra i fatuts cjolts de vite sorprendente di Madame Foer, vivude fra la Italie, Cuba, la Americhe e la Europe, e cuvierte di incuintris e grandis amiciziis cun personis fûr dal comun e personaçs famôs. (A.I.) – 05.07.2023