L’Udin ai americans? I Pozzo a disin di no, ma…

L’Udin isal in vendite o no? Secont un articul publicât martars su “Tuttosport”, pardabon! Un progjet za inviât pe jentrade di un o doi fonts di invistiment americans e che al varès di tirâ dentri ancje il Watford. La societât, o sedi la famee Pozzo – la ultime restade in dute la serie A ae vuide di une scuadre di balon di plui di 30 agns – e dîs invezit di no. Intune note uficiâl, “e dinee in maniere categoriche ce che al jere ripuartât e si maravee che notiziis dal gjenar, dal dut cence mani, a vegnin publicadis”. Secont altris gjornâi, lis tratativis invezit a saressin stadis za inviadis, ancje se Gianpaolo Pozzo al volarès mantignî ancjemò une presince inte scuadre de sô citât, ma il progjet al sarès complicât. (A.I.) – 18.01.2023