I volontaris de Protezion Civîl di Cividât a son intervignûts su domande de Polizie locâl, li de viabilitât de jentrade Nord ae citât ducâl pe rimozion di un grues ramaç ruvinât suntune machine parcade e par fortune vueide in chel moment.
Par chel che al rivuarde la metude in sigurece de cuviertidure di un tet di protezion di balis di fen (a pocje distance di une scuele) puartade vie dal aiaron inte matinade, i volontaris a son intervignûts a supuart des Vuardiis dal fûc.
Lis scuadris dai volontaris a son ladis fûr dopo par controlâ il teritori e sigurâsi che no fossin altris criticitâts.
Il Servizi Nue112 dal Friûl-Vignesie Julie al à regjistrât inte matinade un grant numar di clamadis par dams causâts dal aiar fuart. In dut a son stadis 150 clamadis ogni ore a pet des 70 mediis dal periodi. (A.D.G.) – 01.03.2023
