L’andament dal Pil dal an passât, miôr des spietis, e la riduzion dai presits des materiis primis a son premessis positivis par limitâ il ralentament de cressite. Dut câs, al è masse adore par ritignî ae fin la fase di decelerazion de economie europeane e regjonâl. Ae buine prestazion dal Pil l’an passât, al fâs di cuintrialtâr la frenade de cressite dal cumierç mondiâl, cun riflès su la produzion industriâl, ancje in F-Vj.
La inflazion e je in sbassament ancje se, par ore, in misure minôr in Italie a pet di chei altris paîs Europeans Principâi e, in dut câs, e va disfredade ancjemò di plui cun misuris restritivis. A son chestis lis analisis dal Ufici Studis di Confindustria Udine su dâts Prometeia inzornâts ai 19 di Zenâr dal 2023, che a previodin che il Pil regjonâl intal 2023 al varès di cressi in volum dal 0,4% a pet dal plui 3,7% dal 2022, intant che pal 2024 si previôt une cressite dal 1%.
“Che la cressite e jentràs intune fase di disfredament al jere previodût za intal cuart trimestri dal 2021 al à dit Gianpietro Benedetti, president di Confindustria F-VG – . Intant e je sotentrade la vuere in Ucraine e la presumude crisi energjetiche consecuente, che e à dât la vie a une speculazion fuarte. Il model di furnidure e acuist dal gas al à vût e al è daûr a vê mudaments drastics e si presum che intal cors dal 2023/24 il marcjât dal gas si sarà normalizât e il presit al svariarà in relazion aes disponibilitâts, ae domande, e vie indenant, cussì cemût che al è pal petroli. Al è probabil che il disfredament de economie al vada indenant par un pâr di agns, ma nol sarà dramatic. O vin doi agns par preparâsi a cjapâ il miôr dal periodi bon che al vignarà. laAl è impuartant che intant a sedin inzornadis lis regulis par imigrazion di lavoranzie e tecnics cualificâts extra europeans, metudis in vore lis riformis che la Europe e domande e che a rivuardin ancje un smagriment de burocrazie cuntune aministrazion che e judi il fâ”. (A.D.G.) – 20.01.2023
