I carabinîrs des Compagniis di Pordenon, Sacîl e Spilimberc a vadin indenant cui controi dilunc des stradis par prevignî compuartaments ae vuide che a son pericolôs.
Magari cussì no, ancjemò masse int e va ator cu la machine daspò vê bevût, fat che al met in pericul no dome lôr ma ancje chei altris, come che al dimostre il fat che int e je stade cjatade cjoche daspò vê fat un incident.
In 20 dîs a son stâts cjatâts 10 personis che a vevin un tas di alcul plui alt di ce che e permet la leç. Tal câs di trê incidents a Pinçan, a Brugnere e a Vile di Flum trê vuidadôrs a son stâts positîfs daspò vê fat l’alcul test, ma se tal câs di Vile di Flum la siore che e vuidave e je lade di bessole fûr strade cence fâ dams a altre int, ta chei altris doi câs a son stâts ferîts.
A Davian un om fermât par un control e che si viodeve al jere cjoc in bale, al à fat finte di soflâ tal etilometri e si è cjapat dai carabinîrs ancje une denunzie par no vê fat il test.
Par dute cheste int la patente e je stade daurman ritirade e in cierts câs la automobil e je stade fermade o metude sot secuestri. Che i carabinîrs no molin sui controi lu à dit sclet il comandant provinciâl di Pordenon, il colonel Emanuele Spiller: “Il belanç di cheste ultimis setemanis al mostre trop che e sedi ancjemò slargjade e pericolose la consuetudin di vuidâ daspò ve bevût alcul, ma i incidents che a son stâts a dimostrin che no podin sbassâ la vuaite”. (a.d.g.) – 23.02.2026
