Manifestazion cheste matine devant dal Ospedâl Sante Marie de Misericordie di Udin. Il presidi, inmaneât dai sindicâts, al è une piçule cerce de proteste a difese dal Sisteme sanitari nazionâl che si tignarà a Rome ai 24 di Jugn.
A solidarizâ cui manifestants ancje la conseire regjonâl di Alleanza Verdi e Sinistra, Serena Pellegrino, presinte ae jentrade dal nosocomi. “I citadins a àn plene cussience che la Regjon Friûl-Vignesie Julie e je daûr a stanziâ milions di euros par implementâ il servizi privât dopo vê contribuît, un pas daûr chel altri, a distruzi il servizi public”, e à comentât la conseire, ricuardant i miedis a gjeton, lis lungjis listis di spiete, la incorporazion dai consultoris e la incressite de spese publiche destinade ae sanitât cence indicazions specifichis su lis destinazions tra public e privât. “Mi limiti a visâ – e je lade indevant Pellegrino – la date dal prossim 30 di Jugn cuant che, ancje in Friûl-Vignesie Julie, al saltarà il payback su lis infrazions de spese regjonâl pes furniduris dai dispositîfs medics, po dopo une vore di piçulis e aziendis mediis furnidoris a riscjaran la sierade e i citadins a podaressin scugnî a rinunziâ aes curis, par mancjance dai materiâi, dal fîl di suture aes protesis, passant pes valvulis cardiachis ai dispositîfs salvevite.”
Intune cui manifestants ancje la Conseire regjonâl e miedi oncolic Simona Liguori. “Cui che al guvierne la nestre Regjon – e à dit Liguori – al à di domandâsi il parcè tancj dipendents dai ospedâi a son daûr a lassâ il public e i efiets di chest fenomen. Bisugne garantî lôr un coinvolziment plui alt inte programazion, metint atenzion ae cualitât de vite di cui che al lavore in prime linie, dant atenzion massime a ce che a denunziin i sindicâts rivuart lis cundizions di lavôr une vore duris e la dibisugne de garanzie dai turnis di polse”.
Il probleme al rivuarde di dongje la Regjon Friûl-Vignesie Julie: “Lis listis di spiete cussì lungjis – e continue Liguori – a son il probleme principâl che al derive de mancjance di personâl intai ospedâi e al covente daurman un cambi di pas. I problemis a van risolvûts ae lidrîs e al va fat cun grande urgjence. Il dirit ae salût al è une prioritât di ducj i citadins e al va garantît cun sieltis precisis che a puedin puartâ a risultâts concrets”. (A.D,G.) – 15.06.2023
