“Il Pd al favorirà pe candidature a president la sielte di une figure ancje civiche che e unissi une grande coalizion”. Al è cetant che, in sintesi, al mè vignût fûr de direzion regjonâl dal Pd F-vj, dade adun îr di sere a Roncjis di Monfalcon, che e à aprovât cuntune maiorance tant ample l’ordin dal dì che al da mandât al segretari Renzo Liva di lâ indevant cu lis interlocuzions cun chês altris fuarcis politichis, par sierâ i acuardis su lis elezions regjonâls.
“Il Pd al continue a bati – al zonte il segretari Liva – par che Terzo Polo e 5 Stelle a puedin partecipâ ae taule des fuarcis alternativis a Fedriga. Al onorevul Ettore Rosato o disìn che al è dibant la prove di meti il cjapiel su Udin. Lu sfidìn invezit a sclarî parcè che a Udin e pues jessi une aleance largje cun Pd, fuarcis civichis e autonomistis, fuarcis de çampe intant che in regjon si fâs la cimiade a Fedriga. Cui che al puarte sul teritori i zughets romans – al precise Liva – al prejudiche la nestre regjon”. “Al Movimento 5 Stelle l’invît a confrontâsi sui temis – al zonte Liva – su la scorte di ce che al jere sucedût in chescj agns in consei regjonâl. Sui contignûts al sarà plui facil passâ opzions di formazion”. (A.D.G.) – 5.01.2023
