A Udin intai dîs che a vegnin a cjaparan servizi dîs gnûfs oms de Polizie di Stât. A anunziâlu al è stât l’onorevul Walter Rizzetto, che sul teme sigurece al à afermât di vê fat pression sul ministri dal Interni Piantedosi.
“Dopo lis solecitazions continuis e legjitimis, soredut de bande dai citadins, mi soi ativât sul teme de sigurece inte citât di Udin – al à premetût intune note Rizzetto (FdI) -. Gracie duncje ae azion dal Ministeri dal Interni, e o dîs graciis al Ministri Matteo Piantedosi e al Sotsegretari Wanda Ferro, a Udin a stan daurman rivant dîs unitâts in plui di Polizie. I dîs agjents a operaran subit par cirî di garantî la legalitât e la trancuilitât dai citadins e dai comerciants”.
“Al è un segnâl che al servirà ancje di dissuasion – al à zontât il president de Comission Lavôr de Cjamare e coordenadôr regjonâl di Fratelli d’Italia in Friûl-Vignesie Julie -. O viodarìn cemût che a laran lis robis intai mês prossims. A Udin a servivin rispuestis imediadis e nô lis stin dant. Lis personis a àn di sintîsi libaris a ogni ore di fâ une vite trancuile e il Guvier al è al lôr flanc cuintri la criminalitât. O ringracii ancjemò i conseîrs di oposizion, che nus àn solecitât a colp sul teme. In particolâr o dîs graciis a Antonio Pittioni che si jere tant batût su chest teme, fasint rivâ a Udin doi cjans antidroghe”. (a.d.g.) – 24.10.23
