A cressin lis plaçutis par fâ rivâ a tiere l’elisocors di gnot

Al cres il numar di spazis là che l’elisocors de Regjon Friûl-Vignesie Julie al pues rivâ a tiere par prestâ socors in emergjence-urgjence vie pe gnot.
Il vicegovernadôr cun deleghe ae Salût Riccardo Riccardi al à sclarît cemût che il servizi fondamentâl, un dai prins a jessi ativât in Italie, al sarà fat cussì in maniere ancjemò plui eficiente e zovevule ancje cuant che no je plui lûs: il timp, fondamentâl intai câs dal socors sanitari sul teritori, si ridusarà ancjemò di plui, permetind di assisti lis personis feridis o cjapadis di mâl in mût ancjemò plui svelt. Pal esponent dal Esecutîf al è un altri pas impuartant indenant par garantî la miôr rispueste al citadin in cundizions di dificoltât grave.
Vuê, in Friûl-Vignesie Julie, a son 78 lis plaçutis certificadis pe rivade noturne, cjapadis dentri lis dôs basis di Udin e Cattinara. In graciis di un percors adestratîf noturni che al è tacât di cualchi setemane e che al larà indenant fin ae fin dal mês di Març prossim, i pilotis di elisocors a cjaparan lis competencis par rivâ a tiere in cjamp viert, ancje di gnot e no dome di dì, cemût che al sucêt cumò, simpri in cundizions di sigurece. (A.D.G.) – 21.02.2023