Il judizi di Confindustria Udine sul implant complessîf dal Decret Lavôr al è favorevul. Lu scrîf, intune note, la associazion imprenditoriâl marcant che “lis misuris previodudis dal Decret a son tantis: lis principâls che a tocjin lis impresis a son il tai dal coni fiscâl e i contrats a tiermin” e che il judizi al ven esprimût “in spiete di cognossi e esaminâ intal detai i singui contignûts dal proviodiment”.
“Il gnûf tai dal coni fiscâl – e sotlinee Confindustria Udine – si aplicarà dai 1 di Lui ai 31 di Dicembar dal 2023 e al costarà plui o mancul 4,5 miliarts. La riduzion e va dute a benefici dai dipendents lavoradôrs e no des impresis, parcè che al agjìs su la cuote di contribûts a cjame dai stes. La misure si sume a chê za previodude inte manovre passade alçant dal 3% al 7% il tai pai redits fin a 25 mil euros e dal 2% al 6% pai redits fin a 35 mil. L’aument in buste paie al pues rivâ fin a 100 euros sporcs mensîi. Al va sotlineât il fat che, par slargjâ cheste misure a dut il 2024, inte manovre prossime a volaressin però almancul altris 9 miliarts”.
“Il percors dal tai dal coni fiscâl tacât al è positîf – al comente il president di Confindustria Udine, Gianpietro Benedetti – parcè che la tassazion sul lavôr in Italie e je tra chês plui altis dai Paîs avanzâts e chest al determine un fren ae cressite e ae competitivitât des impresis, di là di une riduzion dal redit net disponibil pai lavoradôrs, che in cheste fase a patissin ancje la erosion dal podê di acuist dai salaris par vie de inflazion. Positive, in chest sens, ancje la incressite dal cuviert di detassazion dai fringe benefits a 3.000 euros cun pussibilitât di rimborsâ lis utencis, ancje se la misure e je limitade dome ai dipendents cun fîs a caric”. (A.D.G.) – 03.05.2023
