Une cunvigne intal non dal pari de glotologjie

Graziadio Isaia Ascoli, nassût a Gurize ai 16 di Lui dal 1829, il pari de glotologjie taliane, al à lassât une ereditât impuartante pai studis di linguistiche comparade, di dialetologjie taliane e romanistiche. Joibe ai 23 e vinars ai 24 in Cjase Ascoli, in vie Ascoli 1 a Gurize, si tignarà la cunvigne “I 150 anni dei Saggi Ladini. Graziadio Isaia Ascoli tra storia e attualità”, inmaneât de Societât Filologjiche Furlane. Al è pussibil partecipâ a dutis i dôs lis sessions ancje in direte streaming sul sît in rêt www.filologicafriulana.it. I “Saggi Ladini” a àn segnât il dibatiment sientific dal Nûfcent european, stant che a ufrissin la descrizion complessive, fonetiche e morfologjiche des varietâts alpinis, de Ligurie al Friûl, permetint al studiôs di vanzâ une propueste par isolâ e definî un gnûf gjenar neolatin linguistic, che lui al à clamât “ladin”. (A.I.) – 22.11.2023