Un viaç intes gjeografiis de anime, dulà che la fisiche e devente un lengaç par esprimi lis emozions: Vincenzo Schettini, il professôr che al è bon di spiegâ la fisiche aes gjenerazions plui zovinis – un fenomen impuartant dai ‘social media’ inte difusion sientifiche – al screarà il festival leterari di “Monfalcone Geografie” miercus ai 25, aes 6 di dopomisdì. La otave edizion de rassegne e sarà une esplorazion dilunc lis stradis dal nestri presint e dal avignì, inte citât che e je une crosere dal Adriatic setentrionâl, fint a domenie ai 29 di Març. Ideât e promovût dal Comun di Monfalcon, in colaborazion cu la Fondazion “Pordenonelegge”, sot la direzion artistiche di Gian Mario Villalta, cui curadôrs Alberto Garlini e Valentina Gasparet, il festival al è un “osservatori” suntun mont che al cambie simpri, incrosant lis riflessions di passe 70 vôs dal pinsîr, de leterature, de storie, dal gjornalisim, de atualitât. La zornade di viertidure, dedicade aes gjenerazions plui zovinis, si sierarà tal teatri cuntun conciert de corâl spetacul Freevoices. (A.I.) – 24.03.2026
Foto di G. Albore
