Jazz e fotos di epoche li di Cinemazero

Daspò de polse vie pal Istât, “spazioZeroJazz” al torne a sunâ tai spazis di Cinemazero a Pordenon cuntune gnove stagjon di musiche dal vîf, imagjins e la atmosfere di un club di jazz. Chest event al è pensât par meti adun la int, scoltâ buine musiche e jessi maraveâts. Il prin event al è in program joibe ai 8 aes 7 sot sere cui Cocktail Capers, il tercet di Luca Grizzo, Andrea Casti e Fabio Bravin, pronts a puartâ la atmosfere de ete de musiche Swing tal spazioZero, cuntun omaç ai grups dai agns Trente e Cuarante dal 1900. Vie dal conciert, sul schermi daûr dai musiciscj si podarà viodi une schirie di imagjins raris dai grancj protagoniscj dal cine mut, che a rivin de colezion di Gideon Bachmann e a son tignudis tai archivis di Cinemazero. La serade e sarà ancje la ocasion par screâ “Stefano Montesi. Ritrats tal cine”, une mostre creade in colaborazion cul CRAF e cu lis Zornadis de lûs di Spilimberc. Cheste mostre e puarte a Cinemazero la vision di un dai fotografs plui atents de Italie al mont dal cine, presentant fotografiis di Martin Scorsese, Woody Allen, Robert Altman, Meryl Streep, Sean Penn, Tom Cruise e cetancj altris, ancje atôrs e regjiscj talians. La stagjon di spazioZeroJazz, che e je simpri a jentrade libare cence sore nuie, e larà indevant cun altris events che a instrecin la musiche dal vîf e lis fotos dai Archivis di Cinemazero. (A.I.) – 07.10.2026