Un video par fâ cognossi lis bielecis di Udin

ll Comun di Udin al cambie pas inte promozion de sô ufierte culturâl, scomençant un gnûf percors par doprâ intal mût miôr i “social” e lis tecnologjiis digjitâls. Il fin al è chel di difondi il plui pussibil, in particolâr fûr dai confins citadins, la bielece e il valôr dal patrimoni culturâl e artistic che si cjate a Udin, doprant gnûfs mieçs espressîfs. Si che duncje al è nassût un progjet di comunicazion incentrât su video e imagjins che, traviers i social de aministrazion comunâl, ma no dome, al podarà rivâ a diviers publics. Prime di dut i zovins e lis lôr fameis, par svicinâju ai lûcs di art di Udin, un patrimoni disponibil par dut l’an, cuntune ufierte siore di avigniments e laboratoris, in plui che di esposizions prestigjosis. Il video realizât di Davide Anzimanni al à tant che protagoniscj i palaçs storics e i museus de citât, cu la modele Alice Pozzo che e fâs scuvierzi lis bielecis di Udin. (A.I.) – 14.12.2023