Un furgon plen di aur e cun targhe ongjarese al è stât fermât de Vuardie di Finance li dal pas di S. Andree intant che al steve par varcâ il confin. Il conducent turc, fermât par un control, al è stât cjatât in possès dal metal preziôs platât dentri di une borse frigo, tignude al flanc dal puest di vuide forsit par no sveâ suspiets. Il trucut nol à ingjanât i financîrs che dentri a àn cjatât 12 chilograms di aur dividûts in 30 laminis e lingots. La scuvierte e je stade fate ai 23 di Mai passâts, cuant che lis Flamis zalis a àn viodût il mieç transitâ a velocitât fuarte.
Il metal preziôs titulât “AU 999”, cence pontadure relative ae divignince e al autôr de fusion artesanâl, al è stât valutât pûr al 99.9% e cuntun valôr al detai di plui o mancul un milion di euros.
Pôcs dîs dopo, une altre patulie de Vuardie di Finance e à scuviert un altri traspuart di aur fat cuntun mieç, simpri cun targhe ongjarese, ancje in chest câs vuidât di un citadin turc. I controi cussienziôs dal mieç a àn permetût di cjatâ pôc mancul di nûf chilograms di aur pûr, simpri cence prescrite pontadure e des previodudis autorizazions al traspuart e cumierç. Il metal preziôs al è stât mitût sot secuestri intune cuntune sume impuartante in bêçs contants, telefons celulârs e il veicul stes.
Cheste ultime partide clandestine di aur, se e sarà confermade la atestazion di purece al 99,9%, e podarès cuotâ plui o mancul 750 mil euros. Ducj i doi i autiscj a son stâts denunziâts ae Autoritât judiziarie par reât di ricicli, in aplicazion de “gnove dissipline dal marcjât dal aur”. (A.D.G.) – 16.06.2023
