Ancjemò plui sigurece a Lignan, indulà che dai prin di Lui e par doi mês, a saran presints plui agjents de Polizie e plui carabinîrs, par garantî plui serenitât ai turiscj. A visâ di chest il Prefet di Udin, Domenico Lione, che îr al è stât a cjâf dal comitât pal ordin e la sigurece publiche, presint ancje il sindic di Lignan, Laura Giorgi.
Dilunc de riunion al è stât ancje decidût di rinfuarcî la sigurece privade intes zonis plui frecuentadis e di fissâ zonis rossis fintremai dai 3 di Avost, indulà che no podaran svicinâsi personis pericolosis e che a dan fastidi.
Chestis zonis rossis a Lignan a saran tra vie Latisana, vie Carso, il lungomare Manin, il lungomare Lignano, vie Sabbiadoro, e dut il toc de splaze che e sta denant. (a.d.g.) – 27.06.2025
