E je finide la prime fase di emergjence leade ai intervents par comedâ i dams ai cuvierts causâts dal brut timp, tacant dai 12 di Lui passâts inte aree plui batude.
A comunicâlu, dopo di un vertiç che si è tignût cheste matine, inte sede dal Municipi di Mortean, al è stât l’assessôr regjonâl ae Protezion Civîl dal Friûl-Vignesie Julie Riccardo Riccardi. “I numars a son impuartants – al à sotlineât l’assessôr – e a dan la misure de imponence dai dams fats dai avigniments meteo aviers, che a son sucedûts in pôcs dîs cun ben vot alertis meteo de Protezion civîl regjonâl: 150 i intervents fats des Vuardiis dal fûc volontariis de Provincie autonome di Bolzan, 173 chei fats des Vuardiis dal fûc volontariis de Provincie autonome di Trent, 82 chei fats des Vuardiis dal fûc de Provincie autonome di Trent, 215 chei fats dai volontaris dal Cnsas, 1.796 chei fats infin des Vuardiis dal fûc dal Cuarp nazionâl, rivadis a supuart di diviersis regjons de Italie. Par un totâl di 2.416 intervents”.
“I intervents a àn rivuardât i cuvierts danezâts intai teritoris comunâi di Mortean, Listize, Bicinins, Puçui, Talmassons e Basilian – al à sclarît ancjemò Riccardi -. Intal pic massim di domandis di intervent par dams, lis clamadis a jerin rivadis a 1.200. Vuê a restin ancjemò 153 intervents di fâ, che si conte di completâju dentri de fin de setemane. Chest risultât impuartant al è stât tocjât in pôcs dîs di impegn straordenari des scuadris che a àn operât cence fermade”. “O gracii ducj chei che a àn dât une man in cheste prime fase di emergjence: tra di lôr, di là des Vuardiis dal fûc e dal Socors alpin, i 3.200 volontaris de Protezion civîl rivâts di dut il Friûl-Vignesie Julie, par un totâl di 4.940 zornadis/om – al è jentrât intal detai Riccardi -. La Protezion civîl regjonâl e à metût a disposizion ben 1.627 mieçs. I tecnics e funzionaris de Protezion civîl dal Friûl-Vignesie Julie dal Pront intervent di emergjence a àn gjestît e a continuin a gjestî i intervents par 37 edificis publics tra scuelis e struturis sanitariis par meti al sigûr i cuvierts e duncje pe lôr impermeabilizazion”. (a.d.g.) – 11.08.2023
