Fieste de Patrie: tante int intune zornade siore di moments simbolics

E je stade pardabon une fieste grande, cun tante partecipazion di public e di autoritâts, chê lade in sene a Caprive domenie ai 16 di Avrîl in ocasion de “Fieste de Patrie dal Friûl”. Tes celebrazions de cuarantesime seste edizion e je stade protagoniste la bandiere dal Friûl: l’Istitût Ladin Furlan “Pre Checo Placerean” e la ARLeF – Agjenzie regjonâl pe lenghe furlane a àn dât al artist marcjesan Francesco Pellegrini la incarghe di fâ une riproduzion fedêl de bandiere storiche. La copie e je stade presentade in maniere uficiâl dilunc de cerimonie civîl. Di cheste edizion indenant, e sarà il “testemoni” che i sindics che a ospitin la Fieste si scambiaran di un an a di chel altri. (A.I.) – 17.04.2023