Il truc nol è gnûf e dispès al ven smascarât, ma cualchidun al prove ancjemò, dut câs: passâ l’esam teoric de patente cence vierzi libri. Auricolâr ben scuindût, un “sugjeridôr” al esterni e il zûc al è fat.
Pecjât che i Financîrs di Pordenon a fossin in alerte inte aule di esam, in acuardi cu la Motorizazion civîl, e a vedin individuât trê candidâts che a rispuindevin ai cuesîts singui dome dopo vê fat dai moviments stranis, tra chei svicinâsi dispès cul bust al video o justâsi il cuel de maie. Ae fin de prove, passade cul massim dai vôts, i trê – un pakistan, un indian e un egjizian -, a son stâts fermâts e controlâts des Flamis Zalis: platâts in maniere abile tra lis pleis dal lôr vistiari, i financîrs a àn scuviert e secuestrât microcjamaris, smartphone, microfons e micro-auricolârs. La trie, cjapade in flagrance di reât, e je stade denunziade.
Lis ricercjis dal compliç esterni a àn puartât ae individuazion, dentri dal domicili dal candidât pakistan, di un so conazionâl cjatât in possès di un russac che al conten dôs cjamesis za furnidis cun microcjamaris e trasmetidôrs, par ce che si pues pensâ di consegnâ a altris che a volevin fâ l’esam, di là di tancj auricolârs, modem e smartphone. Inte abitazion di Sacîl, i financîrs a àn rinvignût ancje un gram e mieç di hashish, mitût sot secuestri aministratîf. (a.d.g.) – 12.10.23
