Si è ativade la racuelte di fonts impuartants par sostignî la gnove realizazion inviade de Fondazione ProgettoAutismo Fvg, vuidade di Elena Bulfone. Al è stât uficializât in chescj dîs, di fat, il progjet de Fondazion par fâ un cuartîr residenziâl pes personis autistichis e pes lôr fameis. E sarà une opare inovative di 5,5 milions di euros, che e je za stade individuade la aree di destinazion a Felet di Tavagnà, in bande ae sede de Fondazion e dulà che e je previodude la edificazion di 16 cjasutis che a ospitaran 35 personis, cun altris 8 lozaments destinâts aes badantis (par 24 puescj), intun contest sostignibil, vert, autosuficient e inclusîf, inricjît di une piste ciclabile e altris areis destinadis a ativitât di condivision, tant che une clubhouse cun ristorant.
Par rivâ al obietîf, la Fondazion e à butât jù une iniziative dite “i prins 500”, sclarint che lis primis impresis o istitûts che a crodaran in cheste iniziative cuntun contribût minim di 2 mil euros, a saran ricuardâts suntun mûr de gnove vile e su la stampe.
Il cont corint pes donazions al è: Fondazione ProgettoAutismo Fvg – Onlus; IBAN: IT70P0708512303000000046000; causâl: erogazion liberâl. La bancje di poie e je la Bcc CrediFriuli. Calcolât il rilêf sociâl de iniziative e i rapuarts che, di tancj agns, la Fondazion e à cul Istitût di credit, il Cda di CrediFriuli vuidât di Luciano Sartoretti al à a pene deliberât di dâ inviament ae racuelte fonts traviers la concession di un prin contribût al progjet di 5 mil euros. (a.d.g.) – 02.10.23
