Aprofitant di un pic di maree basse, si son calâts in aghe, fasint botinade di capis di colôrs. Invezit dai 5 chilos parom che a son permitûts pe pescje ricreative, la Vuardie costiere e à cjatât sul fat doi pescjadôrs che a vevin in barcje 75 chilos e si son becâts une multe di passe 8 mil euros.
Il personâl dal Ufici circondariâl maritim di Grau, dilunc di une operazion che si è fate miercus ae albe in zone Punta Sdobba, dongje de fôs dal flum Lusinç, al à intercetât i doi pescjadôrs sportîfs suntun natant cjariât cun cuasi un cuintâl di capis di colôrs, destinadis salacor al cumierç ilegâl.
I doi a àn aprofitât des secjis dilunc di Punta Sdobba par lâ jù de barcje e arâ il fonts cun ristiei artesanâi.
L’intervent de Vuardie costiere al à sconzurât la comercializazion dai bivalvis, no idonis al consum uman jessint stâts cjapâts sù in areis improibidis, stant che no classificadis, daûr des disposizions de autoritât sanitarie dal Friûl-Vignesie Julie.
Ae fin de operazion, a son stadis fatis sanzions par 8 mil euros e il pescjât al è stât secuestrât. Controladis dal pont di viste sanitari dai veterinaris di Asugi, lis capis di colôrs, ancjemò vivis, a son stadis butadis in mâr.
I controi de Vuardie costiere su la pescje e no dome a laran indevant par dute la stagjon estive. (A.D.G.) – 22.06.2023
